واغلبه صعود لجبل. وبالطريق فيه غابة جميلة تصلح للجلسة وشرب الشاهي وتضبيط الكبسة منطقة خضراء وكلها اشجار. لكن كانت تمطر ولا نقدر نجلس. والا اغراض الطبخ وراس الدافور جايبه معي من السعودية والغاز نشتريه من عندهم. بس اللي منعنا المطر. المهم وصلنا المغارة ودخلنا المنطقة كلها مطاعم وكفيات بس انها مطاعم بسيطة ماهي فخمة واطلالات على البحر من الجبل صورنا البحر من فوق الجبل وكانت السماء غيوم ومطر ومنظر جميل جداً واصوات الامواج كذلك جميلة. نزلنا المغارة والدخول مجاني. المغارة حلوه ومضاءة ونظيفة مرره. واستغربت ان الدخول مجاني. يقولون محفوره باليد. المهم نزلنا ونزلنا ونزلنا تحت. وفيه سراديب يمين وشمال وندخل ونشوف وبالاخير يتقفل الطريق. ونرجع ونمسك الطريق الوسيع واضح انه هو الاساس ونمشي فيه. لييين وصلنا نهايته. البحر قدامك سبحان الله العظيم. تطلع مع فتحه تشوف البحر تحتك مباشرة. منظر ولا اروع. جانا واحد موظف. طمع كلامنا خليجي وجلس يصورنا بجوالاتنا وكان محترف تصوير ماشاء الله عليه. اول شخص قال سبحان ربي الاعلى للاطفال. وشرح لنا بعض الاشياء. مثل فتحه على البحر على شكل وجه. وفتحة ثانية على شكل خريطة المغرب ومن هالاشياء. بعد ماخلص تصوير راح وجلس على كرسية ولم يطلب منا اي شي.
بس كثرتوا طحينة وبساكيت.
بس انا رحت وعطيته 50 درهم. حوالي 20 ريال. طلعنا من المغارة ورحنا للمطاعم اللي فوق واخذنا وكنا جوعانين ماتغدينا. طلبنا بيتزا كبيرة و3 شاهي. ويسمونه اتاي. ويحطونه مع نعناع وحاجه اسمها شبه او قريب من هالاسم. هي نبته ريحتها حلوه. المهم اكلنا وحمدنا الله وطلعنا رجعنا للبلد واتصلنا على صاحبنا اللي اجرنا الفلة. لانه كان ذاكر لصديقنا مطعم اسماك ممتاز وسعر مناسب. المهم تواصلنا معه وارسل لنا الموقع وقال روحو هناك بس لاتدخلون انا جايكم. يقول حتى مايغشونكم ويعطونكم السمك البايت. المهم. رحنا وطلعت المطاعم بميناء طنجه. وقفنا بالمواقف. طبعاً برسوم وانتظرنا وجانا ابو الشباب وجايب صديقه معه. بيتعشون على حسابنا. لكن مهب مشكله. باجره. دخلنا المكان مجموعة مطاعم مزدحمة ومتلاصقة وكلها اسماك ودانا لمطعم اسمه فاطمة وحاجة قبل فاطمه مثل مانقول الاميرة فاطمة او حاجة زي كذى. المهم انه فاطمه. جلسنا على الطاولة وقال بطلب. قلت اسمع. ابي الطلب على قدنا لاتكثر. ولا تقلل. اذا هو كثير ترى مارح احاسب. مابي الانعام تكب وحنا نتحمل الاثم. رحلتي الجميلة الى المغرب - الصفحة 3 - هوامير البورصة السعودية. قال ابشر. طلب لنا صحن كبير ملياااان جمبري لحاله وفوقة بطاطس. هذا بداية. نفضناه نفض وكان لذيذ جداً.